Musəvinin qızlarına qarşı təzyiqlər artıb

Ətraflı

Bölüm: Özəl

Nəşr olunub: 10.02.2012 22:31

Baxış sayı: 172

İran müxalifətinin verdiyi məlumata görə, bu ölkənin təhlükəsizlik qüvvələri  “Yaşıl hərəkat”ın lideri, hazırda həyat yoldaşı ilə birlikdə ev dustağı olan Mirhüseyn Musəvinin qızlarını həbs etməklə hədələyib. Fevralin 9-da “Kəlmə” saytinin verdiyi məlumatda bildirirlir ki, İranın təhlükəsizlik qüvvələrinin əməkdaşları bu barədə Müsəvinin qızlarını xəbərdar edib.  Bir neçə gün əvvəl Müsəvi və digər ev dustaqlarından biri - Kərrubinin ailə üzvləri “25 bəhmən” hadisələrinin ildönümü münasibətilə bəyanat yaymış və bu bəyanatda siyasi məhbusların azadlığa buraxılması tələb edilmışdi. Saytın verdiyi məlumatda o da vurğulanır ki, Musəvinin qızlarına qarşı təzyiqlərə səbəb məhz bu bəyanatlardır. 

Qeyd edək ki, Musəvinin qızları bundan əvvəl də hədə-qorxu dolu ismarışlar alıb. Təhlükəsizlik qüvvələri onları hədələyərək sakit dayanmalarını tələb edir. Onları əsasən həbs edib naməlum yerə aparmaqla, işdən qovmaqla və fiziki xəsarət yetirməklə hədələyirlər. Son bir ildə Musəvi və Kərrubinin ailələri ilə yanaşı, digər siyasi məhbusların ailələrinə qarşı da təzyiqlər artıb. Onların ailə üzvləri tez-tez həbs edilir və ya müvəqqəti olaraq saxlanılır, ölkəni tərk etmələrinə qadağa qoyulur və ya heç bir səbəb göstərmədən işdən azad edilirlər.

Bu çərçivədə keçmiş prezident və İranda müxtəlif dairələrdə böyük nüfuza malik olan Haşimi Rəfsəncaninin də ailə üzvlərinə qarşı təzyiqlər artıb. Onun bir oğlu barəsində məhkəmə qərarı olduğundan ölkəyə qayıda bilmir, sabiq prezidentin qızı isə dəfələrlə saxlanılıb. Hətta fanatik “bəsicilər” xanım Faizə Haşiminin qarşısını kəsərək özünü və ailəsini təhqir edib.

Ümumilikdə, İranda müxalif düşüncəli insanları bütün vasitələrdən istifadə edərək susdurmağa çalışırlar. İran islam dininin dəyərlərinə zidd olaraq müxaliflərin ailə üzvlərinə, hətta qadın və uşaqlara qarşı təzyiq və təhqirlərlə müşayət olunan dözümsüzlük nümayiş etdirməklə əslində öz mahiyyətini açıqca göstərir. Xatırladaq ki, təzyiqlərə məruz qalan indiki müxaliflər də vaxtilə hakimiyyətdə olduqları müddətdə öz müxaliflərinə qarşı daha da amansız davranışlarla fərqləniblər.     

• < Geri
• İrəli >