İranın ətrafındakı həlqə daralır

Ətraflı

Bölüm: Özəl

Nəşr olunub: 07.02.2012 14:21

Baxış sayı: 252

“Reuters” agentliyinin verdiyi məlumata əsasən, İran və Çin arasında 3 aylıq fikir ayrılığından sonra Çin şirkətləri bu ölkədən xam neft idxalını azaltmağa qərar verib. Məlumata görə, Çin şirkətləri mart ayından etibarən İrandan neft idxalını 50 % azaldacaqlar. Çin şirkətlərinin bu qərarı İrana təzyiqlərin daha da güclənməsi mənasını daşıyır. Qeyd edək ki, Çin İran neftinin əsas alıcılarından biri hesab olunur. Çin şirkətlərinin bu addımı İranın xam neftini daha ucuz qiymətə və münasib şərtlərlə almaq məqsədi daşıyır. Xatırladaq ki, ötən həftə Almaniyanın Baş naziri Angela Merkel Çinə səfəri zamanı bu ölkə yetkililərini İrandan neft idxalını azaltmağa və başqa ölkələrdən neft ehtiyaclarını əldə etməyə çağırmışdı.

Bir başqa xəbərdə isə ABŞ prezidenti Barak Obamanın İrana qarşı yeni maliyyə sanksiyalarına qərar verdiyi bildirilir. Barak Obama ABŞ konqresinə yazdığı məktubda da İran Mərkəzi Bankının maliyyə fırıldaqlarına və gizli hesablarına işarə edərək bildirib ki, İranın maliyyə fəaliyyəti beynəlxalq maliyyə bazarları üçün təhlükə yaratdığından daha geniş miqyaslı sanksiyaların icra edilməsi vacib və zəruridir.

Digər tərəfdən, BAEA-dakı diplomatik mənbələrin verdiyi məlumatda bildirilir ki, İranın  yeraltı Fərdu Nüvə Təsisatlarında uranı zənginləşdirmək fəaliyyətləri genişləndirilib. Ötən il İran Nüvə Agentliyi Fərdu təsisatında uranı 20% zənginləşdirməyə başlayacağı haqda məlumat vermişdi.  BAEA-nin rəsmiləri əvvəllər də bildirmişlər ki, İran bu təsisatda 348 sentrifuqa aparatı yerləşdirib. Bu sentrifuqalar iki sırada hər biri 174 ədəddən ibarət idi. Lakin indi İran bu sıraları iki qat artırarıb. Beləliklə, İranın bu təsisatda fəaliyyəti iki dəfə artıb. Yeni quraşdırılan sentrifuqlar fəaliyətə başlayıb və hal- hazırda uranı 20 faiz  zənginləşdirməyi davam etdirir.

İran nüvəni 20% zənginləşdirməyi Fərdu təsisatına nəql edəndən sonra bu ölkənin nüvə fəaliyyəti ilə bağlı beynəlxalq narahatçılıqlar artmağa başlamışdır. Mütəxəssislərin bildirdiyinə görə, uranın 20% zənginləşdirilmişi ikili məqsədlərlə istifadə oluna bilər. Bununla nüvə silahı da əldə etmək mümkündür. Lakin İran bütün ittihamları təkzib edərək bu prosesi yalnız sülhməramlı məqsədlərlə istifadə edəcəyini bildirir. Xatırladaq ki, əvvəllər Fərdu təsisatı beynəlxalq təşkilatlardan gizlədilirdi. Lakin Qərb kəşfiyyatı bu təsisatın yerini və məqsədini açıqlayandan sonra İran belə bir təsisatın varlığı barədə məlumat vermişdi.

• < Geri
• İrəli >